കോഴിമുട്ടയ്ക്ക് റെക്കോര്‍ഡ് വില

കോയമ്പത്തൂര്‍: കോഴിമുട്ട ഉത്പാദന കേന്ദ്രമായ നാമക്കലില്‍ മുട്ടവില ഉയര്‍ന്നു. മുട്ടയൊന്നിന് 3.02 രൂപയാക്കിയാണ് നാഷണല്‍ എഗ് കോഓര്‍ഡിനേഷന്‍ കമ്മിറ്റി തീരുമാനമെടുത്തത്. സര്‍വകാല റെക്കോഡ് വിലയാണിത്. 2010 ഡിസംബര്‍മാസത്തെ ശരാശരി വിലയെക്കാള്‍ 50 പൈസയാണ് മുട്ടയൊന്നിന് ഇതുവരെ ഉയര്‍ത്തിയത്. ഡിസംബറിലെ ശരാശരിവില 2.52 രൂപയായിരുന്നു. ജനവരി 8ന് മുട്ടവില 2.98 ആക്കി നിശ്ചയിച്ചിരുന്നു.

ഉത്തരേന്ത്യയിലെ കൊടുംശൈത്യത്തില്‍ മുട്ടഉത്പാദനം കുറഞ്ഞതും ഉപഭോഗം കൂടിയതുമാണ് വില ഉയര്‍ത്തുന്നതിന് കാരണം.

നാമക്കല്‍ ജില്ലയില്‍ പ്രതിദിനം ഉത്പാദിപ്പിക്കുന്ന 2.75 കോടി മുട്ടയില്‍ 25 ലക്ഷം ഉത്തരേന്ത്യന്‍ സംസ്ഥാനങ്ങളിലേക്കാണ് അയയ്ക്കുന്നത്. ശബരിമല തീര്‍ഥാടനക്കാലം അവസാനിക്കുന്നതോടെ മുട്ടവില ഇനിയും ഉയര്‍ന്നേക്കും.